I-Division khel chhunzawm tur FCSK.

Play-Off match hmuhnawm takah FC Serchhip Kawnpui chuan 4-1 a Bungpui FC, Hriangtlang hnehin Serchhip DFA hnuai ah I Division club an la ni chhunzawm zel.

I-Day Football Tournament 2017 a I Division League ah FC Serchhip Kawnpui hian point 7 hmuin 7na dinhmun an luah a, Tournament ah rawlthar rual hmanga khelin hmuhnawm thin viau mahse lungawi takin Play off match an khelh a tul. An khingpui Bungpui FC, Hriangtlang hi II Division Tournament ah an khel tha in champion tura mi tam tak beisei an ni a, amaherawhchu Final ah penalty shoot out hmangin an vanduai thung. 

Bungpui FC in FCSK an hlau lo!

1^st Half ah Bungpui FC an khel tha in goal chance pawh a ngah zawk mah a, Midfield ah FCSK khel nung tha viau mahse an tlarhnung erawh a pawp zing mawlh mawlh hle. Bungpui FC Captain Angaiha leh an hmatawng chhuanvawr Engliana te FC Serchhip Kawnpui tlarhnung an rum thaih deu reng mai a, 1^st Half tawpnan a minute 5 vel la awmah Bungpui FC lamin goal an khung ta nge nge. FCSK goalkeeper Terina’n tha zeta a dan per chu defender lamin an lo pet chhuak thei mai lo a, Lungtiawia’n rawn nangchingin chiang takin Bungpui FC hmahruaina goal a khung.

FCSK lamin nawr let nghal tum viau mahse a talbuai zawk ah an tang a, Bungpui FC counter attack tha zet mai chu Lalengliana’n goal ah a chantir thei lo hlauh. Han goal ngat se FCSK tan thawh leh a har viau ang.

FCSK danglamna thlentu Ambrose!

FCSK left back PC Malsawmdawngliana’n 2^nd Half tan atanga minute tam pawh a liam hmain siphur sutna goal a khung a, corner atanga ball rawn kal chu mawi takin a khung. FCSK game a kan phah sawt a, Bungpui FC in an thah hnu rei lo te ah Sub atanga lut thar hlim Ambrose-a’n  Rodinsanga ball pek tha zet chu chiang takin a khung zui a, FCSK lamin hma an hruai ve thung. FCSK an phur telh telh a, Bungpui FC lam an chuai telh telh thung. 

Minute 77na ah FC Serchhip Kawnpui lamin penalty an hlawhchhuak a, an Captain C.Lalengsiama’n cool zetin goal ah a chan tir. Bungpui FC in thapui thawhin nawr let viau mahse FCSK tlarhnung an tang khawng ve tlat tawh a, a tlang chhun ah lah FCSK goalkeeper Terina an paltlang thei meuh lo

.

Hun tawp hma hretin Bungpui FC in FCSK counter attack an dawl zo lo a, FCSK forward Madintea leh Ambrose ten mawi taka Bungpui FC tlarhnung an thiah hnuah Ambrose Lawmnasangzuala’n a tlan chakna chhawr tangkaiin fal takin a lalut a, goalkeeper nen chauh inhmachhawnin FCSK chak nemnghehna goal a khung chiang hle.

Posted in: I-Day Football