Serchhip DFA buatsaih, Lalsawmliani & Lalthanchunga memorial
Football runnning trophy vawi 14-na Final ah Ramhlun North FC chuan
1st.Bn MAP Academy hnehin an champion ta.
21.11.2014: Aizawl DFA hnuaia first division club pahnih, 1st Bn MAP Academy leh Ramhlun North FC-te hian vawiin khan Khawtetlang Khelmual, Serchhip-ah Final an khel a, hun pangai ah Goal awm lovin an inhneh tawk a, Penalty shoot-out hmanga chak zawk zawn niin 6-5 in Ramhlun North FC an vannei ta zawk a ni. He inkhelah hian 1st Bn MAP Academy player Joseph Lalsanglura leh Ramhlun North FC player Lalramthlamuana-te chu minute 57-naah hnawh chhuah an ni bawk.
Champion team Ramhlun North FC hian Trophy bakah pawisa fai Rs.70000 an dawng a, Runner Up 1st.Bn MAP Academy-in Trophy leh Rs. 35000 an dawng thung. FC Kulikawn tana goal 6 khungtu Hmingthansanga’n Top Scorer lawmman a dawng a, 14th Assam Riffle hnenah Fair Play Award hlan a ni a. Best Player ah New Serchhip FC striker Christopher Lalhruaitluanga thlan a ni thung.
Enge an sawi?
Champion team Ramhlun North FC coach C.Lalmuanpuia chuan, “Ground kha khelh harsa kan ti ve ve a, kan inchai tawk hle a, a tawpah kan vannei ta zawk. Tin, thil pakhat chu inkhel inhnehtawk tak kan nih vang nge ka hre lova, game a rum a, team leh lam an aggressive lek lek thin avangin kan player te paw'n harsatna an tawk zauh zauh a ni.” tiin inkhel chungchang a sawi.
Ramhlun North FC Boss hian lawmthu sawi chunzawmin,“ New Serchhip North Branch, lawm taka min lo thlenga thlen in te min lo zawnsak vek tute chungah lawmthu sawina tur kan ngah hlein ka hria. Nimin a New Serchhip FC nena kan inkhelh tum pawh khan min la support fan a, an inpekna a ropui kan tiin an chungah kan lawm tak zet zet a ni.
‘Pathian khawngaihna vang liau liauva chak kan ni tih kan hria a, Pathian chungah pawh kan lawm hle a ni.” Tiin a sawi.
1st.Bn MAP Academy coach Lalramhluna'n an vanduai thu leh ground chungchang a sawi tel ve bawk a, “Kan game that ber ni a ni a, mahse kan vanduai ta zawk a ni. Tum hnih ngawt mai bar leh post kan pet per a, kan vanduai ni ti ila ka sawi sualin ka ring lo. Ground kha khelh a harsa a, khuar deuh lai te a awm avangin ball sawh dan a chiang kuang thei lova, kha vang khan kan player ten harsatna an tawk nasa hle a ni.
“Tin, ka naute ka fak lo thei lo va, an fighting spirit a tha em em a, an vanduai ni a ni erawh a pawi ta. Tum thum ngawt he tournament hi kan khel tawh a, vawi hnih final kan lut tawh a, mahse kan la champion zo lo vek a ni. A lehpekah erawh kan champion tawh ngei ang.” a ti.
Inkhel Result: Final
1st Bn MAP Academy 0-0 Ramhlun North FC
(Penalty shoot-out ah 6-5 in Ramhlun North FC an chak)
Champion - Ramhlun North FC (Trophy & Rs.70000)
Runner Up - 1st.Bn MAP Academy (Trophy & Rs 35000)
Best Player – Christopher Lalhruaitluanga, New Serchhip FC
Top Scorer – Hmingthansanga, FC Kulikawn (Goal 6)
Fair Play – 14th Assam Riffle
0 comments:
Post a Comment