District Football Championship 2016 ah New Serchhip FC champion.

Serchhip District Football Association buatsaih, District Football Championship chu nimin khan zawhfel niin, nimin final khelhah hian New Serchhip FC chuan 2-1-a FC Serchhip Kawnpui hnehin  an champion ta a ni.


Nimin inkhel hi an inhnehtawk hle a, First Half-ah hian FC Serchhip Kawnpui an che ṭha zawk a, goal pawh minute 33-ah Laltlanthanga hmangin an thun a, hei bak First Half-a goal lut a awm lova, First half-ah hian FC Serchhip Kawnpui lam hian an nawr deuh zawk angin lang mahse New Serchhip FC lam hi goal bulah an hlauhawm tam zawk mah a ni.

Second Half-ah erawh inkhel ṭantir aṭangin New Serchhip FC-in na takin an nawr nghal a, minute 61-naah H.Lalrempuia hmangin an si phurh an rûl ta nge nge a, hemi hnu hian FC Serchhip Kawnpui lamin goal thun leh tumin bei nghal mahse an nawr hlei thei lova, New Serchhip game a ṭha chho zawk a, minute 72-naah New Serchhip hian goal an thun leh a, he goal hi H.Lalremruata thun a ni. Hun tawp dawn lamah FC Serchhip Kawnpui lam an rawn pâwng leh deuh a, mahse an player pawimawh Lalrinzuala'n ṭul lo taka referee laka ṭawngkam mawilo a hman vangin Yellow Card vawi 2 pe a hnawh chhuah zui a ni a, hun tawp thlengin FC Serchhip Kawnpui lam hian an si phurh an sut thei lo a, New Serchhip FC chu District Champion an ni ta a ni.

 He Tournament-ah hian Remlalruata,  New  Serchhip FC chu Best Player-ah thlan a ni a, goal 6 thuntu New Serchhip FC striker H.Lalremruata chu Top Scorer a ni thung a, Fair Play Team-ah FC S.Kawnpui thlan an ni bawk.

Champion Team, New Serchhip hian March thlaa Khawtetlang Field-a MFA Cup khelh turah Serchhip District ai an awh dawn a ni.

Source: Zothlifim Daily Newspaper, Serchhip

Posted in: Serchhip District Football Championship